İqtisadiyyat Nazirliyinin və Birləşmiş Millətlər Təşkilatının (BMT) Azərbaycandakı Nümayəndəliyinin birgə təşkilatçılığı ilə “2030-cu ilədək Dayanıqlı İnkişaf üzrə Gündəliyi”nin məqsədlərini təşviq etmək, innovasiyaları həvəsləndirmək, eyni zamanda "Azərbaycan 2020: Gələcəyə Baxış" İnkişaf Konsepsiyasının və “Milli iqtisadiyyat və iqtisadiyyatın əsas sektorları üzrə Strateji Yol Xəritələri”nin icrasına dəstək məqsədilə keçirilən İkinci Respublika İnnovasiya Müsabiqəsinə yekun vurulub.

Dekabrın 10-da Bakı Biznes Mərkəzində müsabiqə qaliblərinə mükafatlar təqdim edilib.

Bununla əlaqədar təşkil olunmuş tədbirdə çıxış edən İqtisadiyyat naziri Şahin Mustafayev vurğulayıb ki, son illər Azərbaycanın innovasiya proseslərinə inteqrasiyası, innovasiya iqtisadiyyatına keçidi təmin edən tədbirlərin təşviqi və reallaşdırılması strateji proqram və sənədlərdə, o cümlədən "Azərbaycan 2020: Gələcəyə Baxış" İnkişaf Konsepsiyası və müxtəlif sektorları əhatə edən Strateji Yol Xəritələrində öz əksini tapıb. Bu sənədlərin bir sıra hədəf və istiqamətləri BMT-nin “2030-cu ilədək Dayanıqlı İnkişaf üzrə Gündəliyi” ilə eynilik təşkil edir.

Diqqətə çatdırılıb ki, qloballaşma şəraitində innovasiya fəaliyyətinin keyfiyyətcə yeni müstəvidə genişlənməsi, innovativ yeniliklərin yayılması, habelə onların istehsal sahəsində tətbiqi ölkələr üçün yeni çağırışlar yaradır. Bu çağırışlara uyğun olaraq, ikinci ildir ki, keçirilən Respublika İnnovasiya Müsabiqəsinin innovasiyalara marağı daha da artırmaq məqsədilə təşkil edildiyini diqqətə çatdıran Şahin Mustafayev bu cür tədbirlərin innovasiya fəaliyyətinin stimullaşdırılması və səmərəliliyin artırılması, innovasiya infrastrukturu çərçivəsində kiçik və orta sahibkarlığın inkişafı üçün zəruri şəraitin yaradılması, elmi-tədqiqat bazasının təkmilləşdirilməsi və innovasiya fəaliyyətinin kadr potensialının inkişafı baxımından əhəmiyyətini vurğulayıb. Nazir bildirib ki, müsabiqənin təşkili məqsədilə dövlət qurumları və BMT-nin nümayəndələrindən ibarət komissiya yaradılıb, ötən müddət ərzində müsabiqənin təşviqi və ictimaiyyətin maarifləndirilməsi istiqamətində bir sıra görüşlər keçirilib. İkinci Respublika İnnovasiya Müsabiqəsinə marağın böyük olduğunu qeyd edən nazir Şahin Mustafayev müsabiqə çərçivəsində iqtisadi, sosial və ekoloji sahələri əhatə edən 200-dən çox layihə təqdim olunduğunu, belə tədbirlərin növbəti illərdə də keçiriləcəyini diqqətə çatdırıb.

BMT-nin Azərbaycandakı rezident əlaqələndiricisi Qulam İshaqzai innovasiyaların əhəmiyyəti barədə danışıb, belə müsabiqələrin gələcəkdə innovativ sahələrə investisiya qoyuluşlarının təşviq edilməsinə, elmi nailiyyətlərin və innovasiyaların müxtəlif sahələrdə tətbiqinə, habelə milli innovasiya sisteminin təkmilləşdirilməsinə töhfə verəcəyini vurğulayıb.

Tədbirdə nəqliyyat, rabitə və yüksək texnologiyalar naziri Ramin Quluzadə ölkəmizdə ən son texnoloji nailiyyətlərin tətbiqinin iqtisadiyyatın innovativ inkişafına mühüm töhfə veridiyini vurğulayıb, innovativ layihələrin dəstəklənməsi üçün infrastrukturun yaradılması, startap hərəkatının genişləndirilməsi istiqamətində görülən dəstək tədbirləri barədə məlumat verib. Qeyd olunub ki, “Bakutel-2018” sərgisində startaplar uğurla təmsil olunub.

Mədəniyyət naziri Əbülfəs Qarayev yeni kreativ sənayenin yaradılması, kino, dizayn, musiqi, təsviri sənət və sahələrdə də innovativ düşüncələrin tətbiqinin sürətləndirilməsinin vacibliyini vurğulayıb.

 Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev çıxış edərək elmi tədqiqatlar sahəsində insan resurslarının hazırlanması, səmərəli maliyyələşdirmə mexanizmlərinin tətbiqi barədə məlumat verib. Bildirilib ki, innovasiya layihələrinin qəbulunun sadələşdirilməsi üçün "ASAN xidmət"in "İdeya Bankı" platformasından istifadə olunub.

Tədbirdə İnnovasiya Müsabiqəsinin hər il təşkilinə dair birgə tədbirlərin əlaqələndirilməsi üçün İqtisadiyyat, Mədəniyyət, Nəqliyyat, Rabitə və Yüksək Texnologiyalar nazirlikləri, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, Milli Elmlər Akademiyası və “Ernst and Young” şirkətinin Azərbaycan nümayəndəliyi arasında Anlaşma Memorandumu imzalanıb. Sənədi İqtisadiyyat naziri Şahin Mustafayev, Mədəniyyət naziri Əbülfəs Qarayev, Nəqliyyat, Rabitə və Yüksək Texnologiyalar naziri Ramin Quluzadə, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Milli Elmlər Akademiyasının prezidenti Akif Əlizadə və “Ernst and Young” şirkətinin Azərbaycan nümayəndəliyinin rəhbəri İlqar Vəliyev  imzalayıblar.

Tədbirin sonunda İnnovasiya Müsabiqəsində qalib olmuş ilk üç layihənin, eləcə də həvəsləndirici mükafata layiq görülmüş layihələrin müəlliflərinə diplomlar və mükafatlar təqdim olunub.

***

İkinci Respublika İnnovasiya Müsabiqəsinə maraqlı layihələr təqdim olunub. Müsabiqədə ilk üç yeri tutan layihələr BMT-nin dayanıqlı inkişaf məqsədləri ilə uzlaşmaqla, innovasiyaların tətbiqi ilə iqtisadiyyatın dinamik və davamlı inkişafının təmin edilməsinə, rəqabətqabiliyyətliliyin artırılmasına, sürətlə sənayeləşən dünyada ətraf mühitin mühafizəsinin gücləndirilməsinə hesablanıb. Belə ki, İnnovasiya Müsabiqəsində birinci yerin qalib olan Bakı Ali Neft Məktəbinin tələbələrinin “TermoNorth” layihəsi çərçivəsində soyuq iqlim şəraitində nəqliyyatın mühərrikinin uzun müddət isidilmiş qalması üçün yeni enerji toplayan maye ixtira edib.

İkinci yerə layiq görülən “PictoFy” layihəsi fotoqraflara tədbirlər zamanı çəkdikləri fotoşəkilləri real zamanda onlayn satmaq imkanını verən mobil (android və iOS) tətbiqdir.

“Qreen Doc” və “Mobil Baytarlıq” layihələri isə müsabiqədə 3-cü yerə layiq görülüblər. “Qreen Doc” layihəsi süni intellektdən istifadə etməklə müxtəlif xəstəliklərin diaqnostikası və aşkar edilməsini, “Mobil Baytarlıq” layihəsi isə fermer təsərrüfatlarına, heyvansevərlərə və sahibsiz heyvanlara mobil tibbi xidmətlərin göstərilməsini, həmçinin mobil tətbiq vasitəsilə müvafiq ərazidə olan baytarlıq xidmətləri göstərən məntəqələr haqqında məlumatın əks olunduğu online xəritənin hazırlanmasını nəzərdə tutur.

Müsabiqəyə göstərilən maraq, layihələrin innovativliyi və çoxluğu nəzərə alınaraq daha 3 layihə həvəsləndirici mükafata layiq görülüb. İqtisad üzrə fəlsəfə doktoru Aqşin Əliyevin “Biznes/sahibkarlar üçün onlayn məlumat platforması” layihəsi tariflər, vergi dərəcələri və kommersiya məqəsədləri üçün müxtəlif məhsulların idxalı və ixracı zamanı tələb olunan sənədlər, əmək qanunvericiliyi, sığorta sistemi və kreditlərə çıxış imkanları barədə sahibkarlara onlayn məlumat platforması təklif edir. Həvəsləndirici mükafat almış “Arıçılıq üçün IoT həlli” layihəsi arı pətəyində baş verənləri uzaqdan monitorinq etməyə imkan verir. Fizika üzrə fəlsəfə doktoru Soltanhəmid Məlikovun “Ay-try” layihəsi isə yeni formada sağlam həyat tərzini özündə əks etdirir və müxtəlf sağlamlıq vəziyyətində olan insanlar üçün rahat, qiymət baxımından münasib və effektiv fiziki fəaliyyəti nəzərdə tutur.